بعض ماقيل عن الدخان السوداني

دخان ام رشيم عاقباهو خُمَرُو وطيبو
جنب الحفرة جيت راجيها تقضي تسيبو
الخلّى العشوق من بوخها دارو طبيبو
توب القرمصيص في جوفي سوي دبيبو

دخان ام عبل عطرابتو جات لفتنى
صنقرت اتكرف نخرتى ما كفتنى
لوما العقل وكراع السرير لفتنى
كان تلبت والبوليس هجم كفتنى

دخان ام رشيم عاقباهو خُمرة محلب
جنب الحفرة جيت راجيها كيف الثعلب
الخلّى العشوق من بوخها جنّ وسحلب
توب القرمصيص في جوفي تقّب ولهلب

تبنت حفرتها زيراً قديم وممتّن
اوقدت الطلح بوخاتو للحيل بتّن
ونادت صاحبتها ملصن دهوبن وختّن
وبعد البوخة جرن للتياب إتغتّن

بى العود والطلح وصفة عطرها تركّب
قعدت بى عجن وعرقها جارى يكبكب
وصاحبى شيقا اصبح عجوز متعشكب
كان اوقدت العُشر القاهو جرى متكبكب

  الليل بَرَد وكل زول دخل في تِكيْلو
وينو (المتلي نا) ..ضربو الصقيع وا فليلو ؟!!
ردسولوا الطلح .. ملَّص عقودو و تيلو
طبق البوخ .. قام عرقو الصفيح ما بشيلو