حبالنا الجوة ما تخنت- يحيى فضــــــل الله

حبالنا الجوة ما تخنت

كلمات الشاعر: يحيى فضــــــل الله
الحان و غناء: مصطفى سيد احمد
----------------------------
حبالنا الجوه ما تخنت
----------------------------
طعنا الضل .. طعنا الضل
وفى الأحلام طعنا الفيل
قوافل الغضبه كانت طرحت تلات مرات
دحين جربت عضة زول ملان مغصه
حبالنا الجو ما تخنت
حبال السما الممدود
حبال الصوت وكت يرجع
يجيب الخاطر المردود
تعالى نشوف
غنيواتنا البقت فى الدنيا ما بتشوف
تعالى نشوف
حروف البكا الجواها مافى حروف
تعالى نشوف ... تعالى نطوف
على المدن البقت أشباح
على الجوع القعد مرتاح
على الكلمة البقت فى الجوف
تفتش سكة الأفراح
تعالى نشوف منو البقدر يخاصم طفلة
صبحت هازلة فوق مد الاسى الحرَّاق
ويا غنوتنا ما تفوتى
يا كلمتنا ما تموتى
فتشى فوق ضمير الكلمة
وعن وترا رحل فراق
وعن بلدا رحل فراق
وعن ولدا رحل فراق
عن علما رحل فراق
غنانا الفينا ما بشفع
حديثنا الجوه ما بنفع
تعالى نشوف تعالى نطوف
تعالى نعلم الشفع
تعالى نعلم اليفع
----------------------