الثلاثاء، 2 مارس، 2010

عتــــــــــــــــــرة: يحيى فضــــــل الله



عترة
كلمات الشــــاعر: يحيى فضــــــل الله
الي دموع الصديق الشاعر ادوارد لينو
.....................................
يا واقفه
في عترة مشيك
و معوداني علي الرحيل
يا فكرة بين شعرة وعجين
بتعدم الخطوة السبيل
يا نايحه
في زفة عريس
و الليل يسرب للنجوم
دامس ضلامو علي وشيك
و ما كان وشيك
حلم الوصول
ما بين سلامك
او مجيك
و انا كيف اجيك ؟
والعترة في سكة مشيك
و السكة كذابة دليل
و وشي اصبح ما وشيك ؟
مع اني عاشقك و مشتهيك
و كمان مواعدك
و في النهايات ببتديك
بس كيف اجيك ؟
يا ثابته في عترة مشيك
و معاكسه احلامي القبيل
والفتوي بين شعرة و عجين
بتبدل الضكران ذليل
و تحول الكاتل كتيل
و يا حليلنا منها
يا حليل
زغرودة في الزمن الجميل
زغرودة للزين والعديل
صبحت تعرس لي كتيل
يا حليلنا منها
ياحليل
العتره في الدرب العديل
و القمراء ضوايا ودليل
و الغنيه هداية سبيل
يا حليلنا منها
ياحليل
يا عاتره
و اتلخبط مشيك
هل فكرة خوانة دليل
تقدر تصلح لي مشيك ؟
و لي وين مشيك ؟
والليل يسرب للنجوم
دامس ضلامو علي وشيك
وكيفن مشيك ؟
يا تايه بين عترات مشيك
و انا ليه اجيك ؟
و وشي اصبح ما وشيك
و دربي ناجع ضد مشيك
و عترت في تزييف وشيك
انا ما بجيك

0 التعليقات:

إرسال تعليق

{ ما يلفظ من قول إلا لديه رقيب عتيد}

حنين المهيرة © 2009. تعريب الـطالـب. Design by :Yanku Templates Sponsored by: Tutorial87 Commentcute