الثلاثاء، 12 يناير 2010

شيخ تلب للشاعر محمد طه القدال

حزينة وجوفك دمدم حزين
حزنت وقلب الحازنك خلي
تعدي الحلم الشفيتيهو قديم
وتملا حسارك قلبك ملي
وكل ما هبهب قاصدك نسيم
يلهب جلدك كضبا طلي
فطمت جناك وحضنك رحيم
وحنك تب ما صابو البلي
سمعت غناك وصوتك رخيم
شديد اوتارك زايد حلي
عرفت الغم الصار لك نديم
وشفت الكون بي شوفا جلي
لقيت الكاتلك كافر زنيم
وانت وحيدك قلبك ولي
ياشيخ تلب انزل كبكب
وارمي الحترب في الميضنة
في الباردة تعب لي الحارة تسب
عجمان وعرب في الميضنة
البس خضرب وادخل قصرب
والحس واشرب في الميضنة
دي الدنيا تهب شقيق ما تصب
القبلي حرب
لي سيدك حب لا تخش ضرب
لي يوسف جب في الميضنة
دقنا وشنب درويشنا يسوق
تايوتا تكب في الميضنة
يا شيخ تلب وين الزغلب
الكانو تلب
ديل صبحو غرب
ام اضحو جنب
في الميضنة
انزل كبكب وارمي الحترب
في الميضنة

كبس الهم علي
والحال قبض يا سيد
غبنا فيا كج
وتادو جنبي معيد
مو جنا تجيب
سلسل جنازروا تقيد
بلا غيبوبة البلد
النصيحو مصيد
كنا تلاتة
ود النوق وديك وعتيد
قلنا نكمل الفرض
العلينا نشيد
جينا عليكي يا المحبوبة
شوقنا يايد
بقينا ضهابة متل زولا
ضرير وبليد
ود النوق مركوبو
العليهو يشفق
بقي يتباطا
في خبة مشيهو يلفق
إن جاهو العلوق
صيحة نفاقو تنفق
اصبح جدوا وكل
ما شافلو سلقة يصفق
وديك الجن
رفيق همي وغناي وفني
سوا طريقو في نخبة
وصبح متهني
ما هماهو باسط مية
سكرة يني
كل ما شافلو زفة
جديدة فوقة يغني
يا عتيد الرماد
نط الحيط بالزانة
تفضي الخانة
تلقي جنابو سيد الخانة
فارش دارو لي اسيادو
بيت كرخانة
غافل ضبحة الفجري
وجري السلخانة
يا حميد اقيف
شوف الخلوق محنانة
كفكف دمعتك
والعبرة فوت خناقنة
عسلك سال بحر
فوقو النحل والنانة
ياد ان طاق غرق
جازاك دبابير دانة 
 
 

0 التعليقات:

إرسال تعليق

{ ما يلفظ من قول إلا لديه رقيب عتيد}

حنين المهيرة © 2009. تعريب الـطالـب. Design by :Yanku Templates Sponsored by: Tutorial87 Commentcute